Sulmet izraelite në Gazë shkaktuan sot vdekjen e 30 palestinezëve, sipas zyrtarëve të shëndetësisë, ndërsa një autobus pranë një vendbanimi izraelit në Bregun Perëndimor u sulmua me armë zjarri nga një person, duke shkaktuar plagosjen e të paktën të tetë udhëtarëve. Me armëpushimin që hyri në ditën e tretë ndërmjet Izraelit dhe Hezbollahut, mijëra të zhvendosur në Liban dhe Izrael inspektuan vendbanimet e tyre të dëmtuara në dy anët e kufirit. Zyrtarët izraelitë paralajmëruan se do të veprojnë në rast të shkeljes së marrëveshjes nga grupi militant.
Palestinezët kërkuan familjarët e tyre nën rrënojat e ndërtesave të shkatërruar në Nuseirat, në pjesën qendrore të Rripit të Gazës të premten pas një operacioni ushtarak izraelit në këtë zonë.
Sipas zyrtarëve shëndetësorë palestinezë, sulmet gjatë natës në këtë kamp dhe në pjesë të ndryshme të Gazës shkaktuan vdekjen e të paktën 30 palestinezëve.
Krahas vazhdimit të operacioneve ushtarake, të zhvendosurit në Gazë po kërcënohen edhe nga uria. Sipas punonjësve të ndihmave, sasia e ndihmave që Izraeli po lejon të futen në Gazë tashmë ka arritur në nivelin më të ulët që nga fillimi i luftës 14 mujore në këtë territor, duke përshkallëzuar gjendjen humanitare. Shumica e palestinezëve mbështeten tek furrat e bukës dhe kuzhinat bamirëse, që janë të mbipopulluara, për të siguruar një racion ushqimi në ditë.
Në Bregun Perëndimor, një i armatosur qëlloi një autobus izraelit të premten, duke plagosur tetë persona. Sipas ushtrisë izraelite, sulmuesi, identiteti i të cilit ende nuk është bërë i ditur, sulmoi autobusin në afërsi të një vendbanimi të kolonëve izraelitë para se të vritej nga ushtria izraelite. Tre nga të plagosurit janë në gjendje kritike.
Në Liban dhe Izrael, mijëra të zhvendosur nga konflikti po kthehen në vendbanimet e tyre për të inspektuar shtëpitë dhe bizneset këtë javë pas shpalljes së armëpushimit ndërmjet Izraelit dhe Hezbollahut të mbështetur nga Irani të mërkurën. Konflikti zhvendosi rreth 1.2 milionë persona nga Libani dhe mbi 60,000 nga pjesa veriore e Izraelit.
Në fshatin Baalbek në Liban, Hamza Al Outa gjeti shtëpinë e tij të shndërruar në rrënoja.
“Këto ndërtesa mund të rindërtohen, nuk janë të rëndësishme. Por të dashurit tanë, miqtë, fqinjët, populli, atdheu ynë janë shkatërruar. Përse? Cila ishte aryseja? A nuk mund të jetojmë të sigurt? Jo”, tha ai.
Në Metula, në pjesën veriore të Izraelit, banorët thanë se shumica e tyre po vizitonin shtëpitë por se nuk do të kthehen derisa të ekzistojë kërcënimi i sigurisë.
“Nuk do të kthehem në shtëpi derisa të mos ndihem plotësisht e sigurt, me një ndjenjë siguri dhe qetësie, jo me frikë dhe ankth se na presin më shumë trazira. Kjo marrëveshje armëpushimi nuk më duket shumë e sigurt, por shpresoj për më mirë”, tha e zhvendosura izraelite Linoy Dankenter.
Në një intervistë për televizionin izraelit Kanal 14 të enjten, Kryeministri Benjamin Netanyahu tha se e kishte urdhëruar ushtrinë që të jetë në gjendje gatishmërie “për një luftë intensive” në rast të shkeljes së marrëveshjes nga Hezbollahu.
“Dje i vramë pesë pjesëtarë të Hezbollahut, i kapëm katër, sot sulmuam edhe të tjerë. Askush nuk do të na mashtrojë, jemi duke e zbatuar (marrëveshjen) plotësisht, por nëse situata e kërkon, e kam urdhëruar ushtrinë që të jetë në gjendje gatishmërie për një luftë intensive në rast të shkeljes së armëpushimit”, deklaroi ai.
Izraeli të enjten ndërmori një sulm ajror në pjesën jugore të Libanit ndaj një depo raketash të Hezbollahut, duke e cilësuar si shkelje të marrëveshjes nga grupi militant.
Por përkundër sulmeve sporadike, shenja më e qartë e armëpushimit ishte rënie e nivelit të sulmeve të përgjithshme në Liban që nga fillimi i konfliktit, i cili filloi dhe u zhvillua paralelisht me luftën në Gazë, të shkaktuar nga sulmi i Hamasit ndaj vendbanimeve izraelite në tetor të vitit të kaluar.
