Presidentja e Kosovës, Vjosa Osmani, ka marrë pjesë në Samitin e nivelit të lartë të liderëve të shteteve të Evropës Juglindore, që u mbajt në Tiranë. Ajo falënderoi homologun shqiptar, presidentin Bajram Begaj, për mikpritjen dhe lidershipin në organizimin e këtij takimi të rëndësishëm.
“Faleminderit Presidentit Begaj për mikpritjen dhe lidershipin në këtë samit të nivelit të lartë të liderëve të shteteve të vendeve të Evropës Juglindore në Tiranë”, u shpreh Osmani.
Në fjalimin e saj, presidentja theksoi se zgjerimi i Bashkimit Evropian duhet parë si një interes strategjik i vetë BE-së.
“Zgjerimi i Bashkimit Evropian nuk është një proces bamirësie, por investim strategjik në sigurinë, stabilitetin dhe të ardhmen e vetë Evropës,” deklaroi ajo.
Osmani kërkoi që Bashkimi Evropian të ndërmarrë hapa konkretë ndaj Kosovës, duke përfshirë heqjen e masave ndëshkuese dhe avancimin drejt integrimit.
“Është koha që BE-ja të lëvizë përpara me vendime konkrete dhe të merituara për Kosovën, përfshirë heqjen e masave të padrejta dhe dhënien e statusit të kandidatit për vendin tonë,” tha Osmani.
Ajo shtoi se qytetarët e Kosovës nuk duhet të penalizohen nga masa që nuk i shërbejnë paqes e stabilitetit.
“Qytetarët e Kosovës nuk duhet të mbahen peng nga masa që i dëmtojnë drejtpërdrejt dhe që nuk i shërbejnë as paqes, as dialogut, e as të ardhmes evropiane të rajonit tonë,” theksoi presidentja.
Në fund, Osmani ritheksoi orientimin strategjik të Kosovës drejt strukturave euroatlantike.
“Orientimi i Kosovës është i qartë dhe i palëkundur: drejt BE-së dhe NATO-s, si pjesë e natyrshme e familjes euroatlantike,” përfundoi ajo.
