Deputetët e zgjedhur më 9 shkurt do të mblidhen sërish nesë në Kuvendin e Kosovës në përpjekjen e 23-të për konstituimin e Legjislaturës së nëntë.
Deputetët pritet të mblidhen nga ora 11:00 për vazhdimin e 23-të me radhë të seancës, në përpjekje për konstituimin e Kuvendit të Kosovës.
Ndryshe të martën, për herë të 22-të ka dështuar përpjekja për konstituimin e legjislaturës së nëntë të Kuvendit të Republikës së Kosovës.
Edhe kësaj radhe nuk pati kuorum të mjaftueshëm për formimin e komisionit për votim të fshehtë.
54 deputetë votuan pro, një kundër dhe nuk pati abstenim, teksa deputetët e tjerë nuk morën fare pjesë në votim. Kësisoj, kryesuesi i seancës Avni Dehari njoftoi se seanca ndërpritet për të vazhduar të enjten me fillim prej orës 11:00.
Ndërkohë deputetja Albulena Haxhiu, njëherit kandidatja e VV-së për kryeparlamentare u kërkoi nga të gjithë deputetët që të votohet për komisionin për votim të fshehtë.
“Pavarësisht qëndrimeve personale dhe asaj çfarë ka ndodhur në të kaluarën, ne jemi shumë të hapur të bashkëpunojmë me subjektet politike, por asnjëherë nuk do t’i pranojmë kërkesat e tyre të paarsyeshme, të pajustifikueshme, të cilat nuk përkojnë as me Kushtetutën e as me aktgjykimin e Kushtetueses”, tha të martën ministrja në detyrë e Drejtësisë, Albulena Haxhiu.
