Gjatë periudhës njëjavore të punës, Zyra për Mbrojtje dhe Ndihmë të Viktimave ka trajtuar gjithsej 51 raste të reja në nivel të Kosovës, duke ofruar mbështetje ligjore dhe institucionale për viktimat e veprave të ndryshme penale.
Sipas të dhënave zyrtare, pjesa më e madhe e rasteve të raportuara lidhen me dhunën në familje, me gjithsej 48 raste. Po ashtu, janë trajtuar edhe një rast i trafikimit me qenie njerëzore si dhe dy raste të sulmit seksual.
Gjatë kësaj periudhe, mbrojtësit e viktimave kanë parashtruar në gjykata 3 kërkesa për Urdhër Mbrojtjeje, ndërsa janë dorëzuar edhe 8 kërkesa për Urdhër Mbrojtjeje Emergjente dhe 2 kërkesa për Urdhër Mbrojtjeje të Përkohshëm Emergjente. Po ashtu, është paraqitur një kërkesë për ndërprerje të Urdhrit të Mbrojtjes.
Në kuadër të procedurave ligjore, janë miratuar 6 aktvendime, janë mbajtur 16 seanca gjyqësore dhe 4 seanca në prokurori. Gjatë kësaj jave janë dhënë gjithsej 51 këshilla juridike, janë shqiptuar 6 aktgjykime dënuese, janë realizuar 2 përfaqësime të rasteve në polici, si dhe 8 referime të rasteve në Qendrat për Punë Sociale .
