Konsullata e Republikës së Kosovës në Cyrih ka ulur flamurin në gjysmë shtize, në shenjë nderimi dhe solidariteti për të paktën 40 viktimat dhe të plagosurit nga zjarri tragjik që ndodhi natën e Vitit të Ri në një resort alpin në Crans-Montana.
Në një njoftim zyrtar në Facebook, Konsullata thekson se ky veprim është bërë për të shprehur respekt dhe mbështetje ndaj familjeve të prekura dhe shtetit zviceran. “Në shenjë solidariteti dhe respekti, Konsullata e Republikës së Kosovës në Cyrih ka ulur sot flamurin në gjysmë shtize, në nderim të viktimave të tragjedisë së rëndë në Crans-Montana. Shprehim ngushëllimet tona më të sinqerta dhe qëndrojmë pranë Zvicrës mike në këto momente dhimbjeje”, thuhet në njoftim.
Ndërkohë, sot Zvicra po shënon ditë zie kombëtare në kujtim të viktimave të zjarrit tragjik që ndodhi më 1 janar në Crans-Montana.
