Një burrë i armatosur i dyshuar si spiun izraelit u arrestua në një hotel në kryeqytetin e Malajzisë, Kuala Lumpur, tha inspektori i përgjithshëm i policisë malajziane Razarudin Hussain.
Sipas tij, policia po heton mundësinë që njeriu të jetë pjesëtar i shërbimit inteligjent izraelit, edhe pse i dyshuari u tha autoriteteve se kishte hyrë në Malajzi për të gjetur një shtetas izraelit të cilin e kërkonte në një mosmarrëveshje familjare.
Hussain tha se i arrestuari e bleu armën në Malajzi dhe e pagoi me kriptomonedhë.
“Autoritetet janë në gatishmëri të lartë pas arrestimit dhe siguria e mbretit malajzian, kryeministrit Anwar Ibrahim dhe zyrtarëve të tjerë të lartë është rritur”, tha Hussain.
Malajzia, një vend me shumicë myslimane, mbështet palestinezët dhe ka kritikuar veprimet ushtarake të Izraelit në Rripin e Gazës.
Dy burra të paidentifikuar vranë një shkencëtar palestinez në Kuala Lumpur në vitin 2018, raporton Reuters dhe thekson se grupi militant palestinez Hamas sugjeron se vrasja është kryer nga shërbimi i inteligjencës izraelite Mossad, ndërsa Izraeli i mohon akuzat.
Husain, në një konferencë për shtyp të premten vonë, deklaroi se ishte një 36-vjeçar, tek i cili policia gjeti gjashtë pistoleta dhe 200 fishekë.
Hussain tha se i dyshuari mbërriti në Aeroportin Ndërkombëtar të Kuala Lumpur nga Emiratet e Bashkuara Arabe më 12 mars, duke përdorur atë që besohet të jetë një pasaportë e rreme franceze, raporton Reuters.
“I dyshuari dorëzoi pasaportën e tij izraelite pasi u mor në pyetje nga policia”, shtoi Hussain.
